A Xunta de Galicia segue sen decidirse a conceder as licencias de TDT local. Íao facer o verán pasado o anterior goberno en funcións, logo o prazo remataba a fin de ano, despois dilatouse tres meses ata rematar marzo e, finalmente, Touriño dixo que se faría antes de rematar xuño, mes que, por certo, rematou hoxe cun Consello no que non se tratou o asunto. Será a semana que vén? Cando así sexa, o asunto será comentado aquí moi polo miúdo.
Entre tanto, lembremos o que pon no prego de condicións:
Como mostra: interferencias da televisión asturiana (TPA). E iso que vivo nas Rías Baixas!
Os datos de audiencia do partido de fútbol que enfrontou onte as seleccións de España e Tunisia non deixan lugar para as dúbidas:
| SHARE | CUATRO | LA SEXTA | TOTAL |
| CAT | 39,1% | 12,2% | 51,3% |
| EUS | 38,6% | 18,2% | 56,8% |
| GAL | 43,3% | 16,4% | 59,7% |
No resto das comunidades autónomas superouse o 60% de share. Fonte: Fórmulatv.com.
Tamén hai outras posibles interpretacións, como que somos menos futboleiros ca o resto dos cidadáns españois. Aínda que eu, persoalmente, me inclúo no grupo dos que non sentimos a mínima emoción escoitando himnos de reminisciencias neofascistas como «A por ellos», «Romper gargantas hasta sangrar» e barrabasadas semellantes, non creo que sexa a nota predominante entre os galegos.
Si: non vin o partido nin teño pensado ver ningún, vale?
Engádega: Como xa empezo a ver os comentarios que chegan, teño que confesar que a selección galega tampouco me «pon».
A estrea do late show presentado por Carlos Blanco tivo uns resultados non demasiado malos: un 10,7%.
O programa gustoume, pero aínda é un pouco cedo para sacar conclusións. Non se debe comparar con Sitio Distinto, por moito que Reixa estea de produtor executivo e Blanco participase naquela experiencia pioneira, nin coa Máxima Audiencia de Manquiña, pero é un intento digno de facer un late night show autóctono e diferente a toda a programación centralista das outras canles, tanto se o centralismo vén de Madrid como de Barcelona.
(E fágolles un pouco de publicidade porque teñen unha sección na que comentan blogs, así que… a ver se cae algo).
Previamente estreouse a serie francesa Dolmen, cun share do 9,9. Consta de seis episodios e ten unha fotografía impresionante, por non falar do misterio ou da súa actriz protagonista, Ingrid Chauvin. Algo moi diferente do que estamos afeitos a ver, e máis se a comparamos coa outra cara da moeda: CSI. En Francia foi un éxito, pero aquí é de supoñer que non será tanto. A vindeira semana terase que enfrontar con España–Tunisia.
Tanto se a audiencia acompaña como se non, haille que agradecer á televisión autonómica que arrisque e aposte por novos espazos, en lugar de repetir unha e outra vez as mesmas series e programas.
Segundo os datos do ranking do mes de maio que publica TNS, Galicia/Galiza foi a comunidade autónoma na que o festival de Eurovisión tivo unha audiencia meirande: foi o cuarto programa máis visto do mes. Curioso.
